"Shodlik ekspressi": olg‘a, iqtidor egalari!
Toshkent shahridagi 22-sonli “Mehribonlik” uyi tarbiyalanuvchilari dam olayotgan “Mehribon” bolalar sog‘lomlashtirish oromgohida “Shodlik ekspressi” ko‘rik-tanlovi bo‘lib o‘tdi. Tanlovdan ko‘zlangan maqsad iqtidorli o‘g‘il-qizlarni aniqlash va ulardagi qobiliyatlarni rivojlantirishdan iborat. Bolalar o‘zlari qiziqqan tasviriy sanʼat, tibbiyot ( inson organizmi, zararli odatlarning inson sog‘ligiga zarari, birinchi tibbiy yordam ko‘rsatish qoidalari bo‘yicha bilimlar) pazandalik, shaxmat, sportning turlari, xavfsizlik qoidalari, raqs, ifodali o‘qish singari turli sohalarga yo‘naltirilgan jami 9 ta jamoaga bo‘lindilar. Tanlov ishtirokchilari o‘zlari tanlagan soha bo‘yicha nazariy savollarga javob beribgina qolmay, biror bir mashg‘ulotni amalda bajarib ko‘rsatish, rasm chizish va shunga o‘xshash amaliy ko‘nikmalarni ham namoyish etdilar. Musobaqa natijalariga ko‘ra g‘olib jamoalar esdalik sovg‘alari bilan taqdirlandilar.
