Tutingan ota-onalarni tayyorlash bo‘yicha maxsus o‘quv kurslarga start berildi
Joriy yilning 4 avgust kuni davlatimiz rahbari tomonidan qabul qilingan “Oilaviy bolalar uylari faoliyatini takomillashtirishga oid qo‘shimcha chora-tadbirlar to‘g‘risida”gi qarorda belgilangan vazifalarni amalga oshirish maqsadida Xalq taʼlimi vazirligi bilan hamkorlikda O‘zbekiston Jamoat xavfsizligi universiteti professor-o‘qituvchilari tomonidan o‘quv dasturi ishlab chiqildi. Bugun mazkur o‘quv dasturiga asosan tutingan ota-onalarni tayyorlash va qayta tayyorlash bo‘yicha maxsus o‘quv kurslariga start berildi.
Mazkur o‘quv kurslari 72 soatga mo‘ljallangan bo‘lib, ota-ona qaramog‘idan mahrum bo‘lgan bolalarni oilalarga joylashtirish hamda oilaviy bolalar uylarini ijtimoiy, psixologik hamda pedagogik kuzatib borish uchun imkoniyat yaratadi. Chunki kurslar yordamida tutingan ota-onalar malakali ijtimoiy soha mutaxassislari bilan to‘g‘ridan-to‘g‘ri aloqa o‘rnatib, bolani oilaga qabul qilish jarayonidan tortib, oila aʼzolari hamda oilaning yangi aʼzolarining bir-birlariga bo‘lgan munosabatlari, yangi ijtimoiy hayotga moslashib, oilada ruhiy sog‘lom muhitni yaratish kabi masalalarda o‘z bilim, ko‘nikma va malakalarini egallash imkoniyatiga ega bo‘ladilar.
Shuningdek, o‘quv dasturi bo‘yicha tinglovchilar oldiga qo‘yilgan talablardan biri yetim va ota-ona qaramog‘idan mahrum bo‘lgan bolalarni davlat tomonidan qo‘llab-quvvatlanishi bo‘yicha davlat siyosati, uning meʼyoriy-huquqiy asoslari, adaptatsiyaning barcha shakllari, muloqot turlari va uning ijtimoiy psixologiyasi, bolaning oila va jamiyatda ijtimoiylashuvi jarayoni haqida aniq bilim va tasavvurga ega bo‘lishlaridir.
