“Temurbeklar maktabi” bitiruvchilari – “Mehribonlik” uyi tarbiyalanuvchilari uchun namuna
Poytaxtimizdagi 22-sonli “Mehribonlik” uyi tarbiyalanuvchilari va tarbiyachilari xushxabar bilan bo‘lishdi: ular bilan birga voyaga yetgan ikki nafar yigit Milliy gvardiya “Temurbeklar maktabi” Toshkent harbiy akademik litseyini muvaffaqiyatli tamomladi.
Litseyda bitiruv bayrami bo‘lib o‘tgan kuni bolalar va o‘qituvchilar bitiruvchilarning yaqinlari va do‘stlari orasida marosimni kuzatar ekanlar, hayajon va iftixor tuyg‘ularini his qilishdi. Ibragimov Akbarbek va Farhodov Shahzod diplom olish uchun saf maydoni markaziga shahdam qadam bilan kirib kelishganida bolalarning yuraklari hayajondan tez-tez urganini tabassum bilan aytib berishdi. Aynan shu lahzada ko‘pchilik tarbiyalanuvchilarda “Temurbeklar maktabi”ga o‘qishga kirish istagi paydo bo‘ldi va marosimdan so‘ng, ular Shahzod va Akbardan ushbu maskanga o‘qishga kirish imtihonlariga qanday tayyorgarlik ko‘rganliklari haqida so‘rashdi. Shundan so‘ng, ushbu lahzalarni fotosuratlar orqali tarixga muhrlab, bizlar bilan bo‘lishdilar.
