Ranglar jilosida - ona vatan chizgilari mujassam
Yosh iqtidor egalarini aniqlash, ularning isteʼdodini kamol toptirish, yigit-qizlarning madaniyat, sanʼat va boshqa yo‘nalishlardagi qobiliyatlarini shakllantirish maqsadida 24-sonli Mehribonlik uyi tarbiyalanuvchilar ishtirokida "Ranglar jilosida- ona diyor” shiori ostida rasmlar tanlovi tashkil etildi.
Milliy gvardiya Toshkent viloyati boshqarmasi tasarrufidagi harbiy qism masʼullari va “Qo‘riqlash” boshqarmasi xodimlari tashabbusi bilan o‘tkazilgan tadbirda 50 nafarga yaqin bolajonlar ishtirok etib , turli yo‘nalishlarda rasmlar chizdilar.
Har bir surʼatda bosh g‘oya Mustaqillik, Ona Vatan, ezgulik kabi umumbashariy qadriyatlar tarannum etilgan bo‘lib, har bir chizgida bolalarcha samimiylik hamda beg‘uborlikni ko‘rish mumkin.
Qibray tumanida joylashgan nodavlat harbiy sport maktabi o‘quvchilari ishtirokida ko‘rgazmali chiqishlar namoyishi ham tarbiyalanuvchilar olqishiga sazovor bo‘ldi.
Ayniqsa, yigit-qizlar ishtirokida tashkil etilgan stol tennisi, arqon tortish, yugurish sport turlari bo‘yicha o‘tkazilgan musobaqalarda tarbiyalanuvchilarning chaqqonligi hamda epchilligi sinab ko‘rildi.
Kun davomida tashkil etilgan turli madaniy maʼrifiy-tadbirlar hamda sport bellashuvlarida mehribonlik uyining tarbiyalanuvchilari turli yo‘nalishlarda sovrindor bo‘lib, tashkilotchilar tomonidan taqdim etilgan esdalik sovg‘alari hamda faxriy yorliqlarga ega bo‘ldilar.
