Sirdaryo viloyatida tutingan ota-onalarni malakasini oshirish kurslari yakunlandi
Sirdaryo viloyatida tutingan ota-onalarni tayyorlash o‘quv kurslarida o‘qish istagini bildirgan nomzodlar bilan mashg‘ulotlar yakunlandi. Mashg‘ulotlar joriy yilning 20-31 avgust kunlari Milliy gvardiyaning Sirdaryo viloyati bo‘yicha boshqarmasi bazasida bo‘lib o‘tdi. Kursni O‘zbekiston Respublikasi Jamoat xavfsizligi universitetining “Harbiy-vatanparvarlik, maʼnaviy-maʼrifiy tarbiya va yoshlar bilan ijtimoiy ishlash” kafedrasi professor-o‘qituvchilari olib bordilar.
O‘quv kursi boshlanishidan avval nomzodlarning emotsional va ruhiy barqarorlik darajasini aniqlashga qaratilgan psixologik tashxislash ishlari amalga oshirildi. Tashxislash ishlari natijalariga ko‘ra, farzand asrab oluvchilarga malaka oshirish kursida o‘qish imkoniyati berildi.
Mazkur kurslar yordamida tutingan ota-onalar malakali mutaxassis, ijtimoiy soha mutaxassislari bilan to‘g‘ridan-to‘g‘ri aloqa o‘rnatib, bolani oilaga qabul qilish jarayonidan tortib, to oila aʼzolarining hamda oilaning yangi aʼzosining bir-birlariga, yangi munosabatlarga, yangi ijtimoiy hayotga moslashib, oilada ruhiy sog‘lom muhitni yaratish kabi masalalarda o‘z bilim, ko‘nikma va malakalarini egallash imkoniyatiga ega bo‘ldilar. Bundan tashqari, ota-onalarga farzandlarining iqtidori va ijodiy qobiliyatlarini aniqlash va yuzaga chiqarish usullari o‘rgatildi.
Kurs yakunida nomzodlar ikki bosqichli imtihon topshirishdi. Birinchi bosqichda tinglovichlar tugallangan kurs bo‘yicha savollarni o‘z ichiga olgan test sinovlarini topshirdilar. Test sinovlaridan muvaffaqiyatli o‘tib, 2-bosqichda bolaning huquqiy, psixologik va ijtimoiy himoyasi masalalari bo‘yicha suhbat o‘tkazildi.
Kurslarni muvaffaqiyatli tamomlagan tutingan ota-onalarga sertifikatlar topshirildi.
