"VATAN — MUQADDAS, UNI HIMOYA QILISH — SHARAFLI BURCH!"
Bugun erta tongdan, O‘zbekiston Respublikasi Mustaqilligining 31 yillik tantanalari arafasida "Vatan — muqaddas, uni himoya qilish — sharafli burch!" shiori ostida Jondor tumanidagi Mahmud Tarobiy nomidagi vatanparvarlik bog‘iga ekskursiya tashkil etildi.
Mazkur tadbirda Mattiyevlar, Behbutovlar, Saidovlar oilasi farzandlari hamda harbiy xizmatchi, xodimlarning oila aʼzolari ishtirok etdilar.
Eʼtirof etish joizki, vatanparvarlik bog‘ida tank, piyodalar va desantchilarning jangovar mashinalari, zirhli transportyorlar, turli kalibrli artilleriya qurollarini ko‘rish mumkin bo‘lib, ushbu ko‘rgazmalar orqali yurtimiz manfaatlarini nafaqat harbiy, balki barcha sohalarda himoya qilishga tayyor turish hamda Qurolli Kuchlarimizning qudratini hayotiy misollar va taʼsirchan vositalar orqali yoshlar ongiga singdirib borishga alohida eʼtibor qaratilgan.
Shu bilan birga, bu bog‘ sayyohlar qadami uzilmaydigan, yoshlarga ona Vatan, hurlik, erk, xalqparvarlik mavzusida saboq o‘tiladigan maskan hisoblanib, madaniy hordiq chiqaradigan, tarixiy xotira va salohiyatni yuksaltiradigan majmua hamdir.
Tadbirda Mahmud Tarobiyning xalq qahramoni sifatidagi jasorati alohida tilga olindi. Uning jasorati dovyurak va jasur ayol podshoh To‘maris, erk uchun kurashchi, xalqparvar cho‘pon yigit Shiroq, xalq qahramonlari Muqanna, Temur Malik, Jaloliddin Manguberdi, Najmiddin Kubrolar qatorida turishi eʼtirof etildi.
