Ulg‘ayib kelayotgan avlodni tarbiyalash – milliy kadrlarni tayyorlashning ilk pog‘onasi
Malakali, o‘z ishini yaxshi bilgan mutaxassislar davlatning va iqtisodiyotning istalgan sohasi uchun juda zarur. Zero, yuqori malakali kadrlar mamlakat taraqqiyoti, el-yurt farovonligiga juda katta hissa qo‘shadi. Mutaxassis tayyorlashning birinchi pog‘onasi – ulg‘ayib kelayotgan yosh avlodni har tomonlama rivojlangan shaxs qilib, dunyoqarashi keng, bilimdon, ziyrak, jismonan kuchli, chaqqon qilib tarbiyalashdir.
Bugun Toshkent shahridagi 22-sonli “Mehribonlik” uyida Milliy gvardiya vakillari bolalarni sport bilan shug‘ullanishi, rasm chizish, raqs, kitob mutolaa qilish va boshqa mashg‘ulotlar o‘tkazishga qaratilgan qator tadbirlar uyushtirdi.
“Mehribonlik” uyi hududi bir nechta maydonchalarga ajratildi. Misol uchun, maydonchalardan birida bolalar kuch sinashib, arqon tortishdi va tosh ko‘tarishdi. Boshqa maydonchada ishtirokchilar qo‘lni belga qo‘ygan holda tish bilan do‘ppi ko‘tarishdi. Milliy sport turlari bilan shug‘ullanish shu darajada qizg‘in o‘tdiki, yosh kurashchilar va “lyanka” o‘yini havaskorlari namoyishlar ko‘rsatishdi.
Shuningdek, bir tomonda rassomlar tanlovi ham bo‘lib o‘tdi. Bolalar va qizaloqlarga ekologiya, atrof-muhitni himoyalash mavzusida rasmlar chizish vazifasi berildi. Yaʼni, tanlov ishtirokchilari nafaqat rassomlik qobiliyatini namoyish qilish, balki ekologiya masalasi haqida bilimini ko‘rsatishi kerak edi. Bolalar sitqi dildan harakat qilishdi. Eng yaxshi rasmlar “Tozalik” loyihasiga jo‘natiladi va ijtimoyi tarmoqlardagi loyihaning axborot resurslariga chiqariladi.
Maʼnaviyat va maʼrifat mashg‘ulotlari zalida esa bolalar va qizaloqlar chinakam teatrlashtirilgan spektakl namoyish etishdi. Teatrlashtirilgan miniatyuralar tomoshabinlarga nafaqat bolalarning rol o‘ynashdagi qobiliyati haqida xulosa qilish imkonini berdi. Birinchi navbatda yosh isteʼdodlardan milliy anʼana va urf-odatlarni, jumladan, mehmondo‘stlik anʼanalari, to‘y marosimi hamda milliy taomlar, qo‘shiqlar, raqslar va askiya mahorati kabilarni bilishi talab etildi.
Ko‘tarinki kayfiyatda “Mehribonlik” uyi barcha tarbiyalanuvchilarini qamrab olgan, tanlov va musobaqalarga boy tarzda o‘tgan tadbir o‘z nihoyasiga yetdi. Sport musobaqalari g‘oliblari medal va esdalik sovg‘alari bilan taqdirlanishdi. Shuningdek, boshqa tanlov ishtirokchilari ham sovg‘asiz qolmadi. Milliy gvardiya Markaziy devoni vakillari bolalarga sovg‘a va mukofotlarni topshirib, har bir qatnashuvchiga faol ishtiroki va harakati uchun minnatdorchilik bildirishdi.
