Har bir kunni aql va har tomonlama rivojlanish uchun foydali mashg‘ulotlar bilan o‘tkazamiz
“Mehribon” bolalar sog‘lomlashtirish oromgohida 22-sonli “Mehribonlik” uyi tarbiyalanuvchilarining taʼtil kunlari bu maskanda maroqli, sog‘liq va ruhiyatga foyda keltiradigan mashg‘ulotlar bilan o‘tmoqda. Jumladan, kuni kecha ushbu maskanda dam olayotgan bolajonlar o‘rtasida “Zakovat” intellektual o‘yinini bo‘lib o‘tdi.
Eng bilimdon va zukkolar nomi uchun to‘rtta jamoa kurash olib bordi. Dam olish kunlari esa O‘zbekiston tarixi davlat muzeyi xodimlari oromgohga kelib, munchoqdan buyumlar yasash, naqqoshlik, kulolchilik va badiiy rangtasvir bo‘yicha mahorat darslari tashkil etdilar. Mashg‘ulotlar davomida muzey xodimlari bolalarga O‘zbekiston dekorativ-amaliy sanʼati tarixi, bizgacha yetib kelgan loydan yasalgan idishlar va o‘yinchoqlarni bo‘yash, kashta tikish, zargarlik buyumlarini yasash anʼanalari haqida so‘zlab berishdi.
