GVARDIYaChILAR MEHRIBONLIK UYI TARBIYaLANUVChILARIDAN XABAR OLISHDI
Marg‘ilon shahridagi 1-son Mehribonlik uyi tarbiyalanuvchilariga Milliy gvardiya Farg‘ona viloyati bo‘yicha boshqarmasi harbiy hizmatchilari tomonidan ikkita kompyuter va televizor tuhfa qilindi. Bolalar va tarbiyachilarga sovg‘alar juda manzur bo‘ldi va minnatdorchilik bildirishdi. Kompyuter va internet ta’lim, televizor esa qiziqarli filmlar va informatsion dasturlarni tomosha qilish uchun zarur bo‘lgan texnika vositalaridir.
Shu bilan bir qatorda, harbiy xizmatchilar Marg‘ilon shahrida joylashgan mehribonlik uyiga tez-tez tashrif buyuradilar. Dam olish kunlari har qanday yuzaga keladigan kundalik muammolarni bartaraf qilish, hafta ichida esa tadbirlarni tashkil etishga ko‘maklashib, bu bilan birgalikda o‘g‘il va qizlar bilan suhbatlashishadi. Bu kabi tashriflar tarbiyalanuvchilarga o‘zgacha kayfiyat ulashmasdan qolmaydi. Ayniqsa, bu kabi uchrashuvlar vaqtida bolalar gvardiyachilar bilan o‘z hayotiy voqealarini baham ko‘rishadi va bu narsa ularga xuddi o‘z otasidan maslahat so‘rashdek imkonni beradi.
