Xotira va qadrlash kuni munosabati bilan 30-Mehribonlik uyi tarbiyalanuvchilari tomonidan tayyorlangan konsert dasturi namoyish etildi.
Bugun 30-Mehribonlik uyida Xotira va qadrlash kuniga bag‘ishlangan tantanali tadbir bo‘lib o‘tdi, unda Milliy gvardiya qo‘mondoni general-mayor R.Djurayev, Respublika estrada va sirk kolleji direktori o‘rinbosari G.Shuvalova, Bolalar psixologiyasi markazi psixologlari, Milliy gvardiyaning Toshkent shahar boshqarmasi boshlig‘i o‘rinbosari, podpolkovnik M.Xo’janazarova, qo‘riqlash boshqarmasi xodimlari ishtirok etishdi.
Bolalar bu kunga puxta tayyorgarlik ko‘rishdi. Ularni xoreograf V.Gordienko, rejissyor F.Usmonxo‘jaeva va uning o‘rinbosari F.Gabbasovalar birgalikda Ikkinchi jahon urushi yillarida yoshlar va bolalar taqdiri haqida hikoya qiluvchi sheʼr va qo‘shiqlar, raqs kompozitsiyalari, teatrlashtirilgan sahnalarni o‘rgatdilar. O‘quvchilar urush paytida xalqlar boshiga tushgan sinovlar, Ikkinchi jahon urushi frontlarida qatnashgan vatandoshlarimizning qahramonliklari, o‘zbek xalqining urushga qo‘shgan hissasi, fashizm ustidan qozonilgan g‘alaba va O‘zbekistonga evakuatsiya qilingan minglab bolalarning o‘zbek oilalari o‘z bag‘riga olgani haqida hikoya qiluvchi hujjatli kinoxronika va badiiy filmlardan parchalar namoyish etildi.
Konsert dasturidan so‘ng Milliy gvardiya qo‘mondoni so‘zga chiqib, bayram bilan barchani tabrikladi. Namoyish etilgan sahna ko‘rinishlari tomoshabinlarning har birining qalbidan joy olganini taʼkidlab, kelgusi yil fashizm ustidan qozonilgan g‘alabaning 80 yilligi nishonlanadigan mixim sanada, tarbiyalanuvchilarga katta sahnada o‘z isteʼdodlarini namoyish etish taklifini berdi.
Tadbir esdalik uchun suratga tushish va kechki choy ustida suhbat bilan yakunlandi, bolalar esa o‘zlarining orzu-istaklari bilan o‘rtoqlashdi.
