YANGI O‘ZBEKISTONDA - YANGICHA TIZIM
Bugun 10 avgust kuni Milliy gvardiya qo‘mondoni general-mayor R.Djurayev raisligida “Yetim bolalar va ota-ona qaramog‘idan mahrum bo‘lgan bolalarni davlat tomonidan qo‘llab-quvvatlashning yangi tizimini joriy etish chora-tadbirlari to‘g‘risida” gi Prezident qarorining mazmun mohiyati, shuningdek ushbu yo‘nalishda tubdan yangilangan tizimni joriy etish bo‘yicha ishlab chiqilgan yo‘l xaritasida belgilangan vazifalarni shaxsiy tarkibga yetkazishga bag‘ishlangan videoselektor yig‘ilishi bo‘lib o‘tdi.
Mazkur yig‘ilishda Mahalla va oilani qo‘llab-quvvatlash, Xalq taʼlimi, Sog‘liqni saqlash, Mudofaa va Ichki ishlar vazirliklari hamda Mehribonlik uylari mutasaddi rahbarlari, viloyat va shahar hokimliklari, vasiylik va homiylik organlari masʼul xodimlari, Oilaviy bolalar uyi faoliyatini yo‘lga qo‘ygan fuqarolar, ushbu yo‘nalishga masʼul bo‘lgan Milliy gvardiya tarkibiy va hududiy bo‘linmalarining harbiy xizmatchi hamda xodimlari, shuningdek jurnalistlar ishtirok etishdi.
Yig‘ilish davomida Milliy gvardiya qo‘mondoni yurtboshimiz raisligida
28 iyul kuni nogironligi bo‘lgan, ota-ona qaramog‘idan mahrum va yetim bolalarni davlat tomonidan qo‘llab-quvvatlashni kengaytirish bo‘yicha o‘tkazilgan videoselektorda aniq vazifalar va maqsadli yo‘nalishlar belgilab berilgani to‘g‘risida eslatib, ushbu yo‘nalishda tarixiy ahamiyatga ega bo‘lgan yangi tizimning mazmun-mohiyatini bir qator misollar bilan yoritib berdi.
Ochiq muloqot tarzida davom etgan yig‘ilish mobaynida hamkor vazirliklar mutasaddi rahbarlari so‘z olib, Mehribonlik uylari to‘g‘risida Milliy gvardiya qo‘mondoni tomonidan taʼkidlab o‘tilgan muammoli masalalar va ularning yechimi to‘g‘risidagi takliflarini qo‘llab-quvvatlagan holda kelgusida hamkorlikdagi ishlarni jadallashtirishga va yangi bosqichga olib chiqishga so‘z berdilar.
Samimiy ruhda davom etayotgan va yoshlar taqdiri bilan bog‘liq muhim masalalarning yechimi o‘rtaga tashlanganidan to‘lqinlangan Mehribonlik uylari rahbarlari ham so‘zga chiqib, Mehribonlik uylarining faoliyat yuritishi Yangi O‘zbekistonimizga yarashmasligini, shuningdek oliyjanob xalqimiz tomonidan Oilaviy bolalar uylari tashkil qilinishi oqibatida mamlakatimizda “yetim” degan tushunchaga barham berilishiga ishonch bildirdilar.
Xulosa sifatida shuni taʼkidlashimiz joizki, Milliy gvardiya va joriy qilingan yangi tizimga bildirilgan ishonch mazkur yo‘nalishga masʼul bo‘lgan barcha harbiy xizmatchi va xodimlarimizga katta masʼuliyat yuklash bilan birga ushbu muqaddas burchni ado etishda faxr va iftixor bag‘ishlaydi.
