HAYDOVCHILIK KASBI BILAN TANISHUV
Milliy gvardiya Andijon viloyati bo‘yicha boshqarmasi harbiy xizmatchilari, viloyat IIB Yo‘l harakati xavfsizligi boshqarmasi xodimlari va “Vatanparvar” mudofaaga ko‘maklashish tashkiloti vakillari hamkorligida Oilaviy bolalar uyi tarbiyalanuvchilari va homiylikka olingan o‘smir yoshlar uchun Qo‘riqlash boshqarmasining o‘quv maydonchasiga ekskursiya tashkil etildi.
Tadbir davomida, bolalarga yo‘l harakati qoidalari bo‘yicha darslar nazariy va amaliy tarzda o‘tilib, avtotransportni boshqarishning asosiy qoidalari tushuntirildi.
Shu bilan bir qatorda, tajribali instruktorlar nazorati ostida bolalar o‘zlari mashinani ishga tushirib, mustaqil harakatlantirib ko‘rishdi.
Barcha ishtirokchilar mashg‘ulotlardan mamnun bo‘lishdi va eng muhimi ular haydovchining vazifalari haqida tasavvurga ega bo‘lishdi. O‘quv mashinasini boshqarishga taklif qilinganlarning aksariyati kasb tanlash yoshida bo‘lib, bu mashg‘ulotlar ularga mazkur tanlovlarida katta yordam berdi.
