Мазкур тадбир Миллий гвардия ҳузуридаги Болалар психологияси маркази томонидан ташкил этилди.
Тадбирнинг ўзгачалиги ёшлар психологияси билан боғлиқ янгича ёндашувдаги қизиқарли ўйинлар ва уларнинг ранг-баранглигида бўлди. Меҳрибонлик уйи тарбияланувчилари учун ташкиллаштирилган мазкур тадбир махсус тайёрланган видеоролик орқали ёшларни "Космосга учиш" орзуларини ҳис қилишдек ноёб туйғуларни туҳфа қилишдан бошланди.
Миллий гвардия Психологик маркази мутахассислари томонидан болажонлар учун олдиндан тайёрланган турли хилдаги ва уларнинг иқтидорини намоён этишга йўналтирилган услубдаги ўйинлар, шунингдек, ҳақиқий рок мусиқачилари, "Илҳом" театри ижодкорлари ва эстрада хонандалари болаларга нафақат байрамона кайфият, балки ўзгача завқ бахшида этишди. Бу эса Янги йилга бағишланган бошқа тадбирлардан тубдан фарқ этиб болажонлар учун 2023 йил томон қўйилаётган юқори кайфиятдаги ишончли қадам бўлди.
Албатта, анъанавий тус олган Қорбобо ва Қорқиз ҳам ушбу тантанали тадбирга ташриф буюриб, ўғил-қизларни кўнглидан жой олишди.
Болажонлар учун ташкил этилган кўнгилочар ва маърифий тадбирда янги йилга бағишланган байрамона концерт дастури ва юқорида таъкидлаганимиздек байрам форматига мослаштирилган енгил маҳорат дарслари, психологик тренингнинг айрим турлари, спорт машғулотлари элементлари, шунингдек, дастурлаш, рақс, йога, пазандалик, тикувчилик каби машғулотлар ўтказилди.
Маҳорат дарсларида Марказ мутахассислари, жумладан, кўп йиллик тажрибага эга амалиётчи психологлар, малакали хореографлар ва йога бўйича инструкторлар, шунингдек, тажрибали пазандачилик усталари, робототехника тўгараклари раҳбарлари, рассомлар ва спорт усталари иштирок этди.
Концерт давомида Тошкентнинг "Электрооко" рок гуруҳи, Маънавият ва маърифат маркази эстрада хонандалари, рақс ансамбли болажонлар учун ўз чиқишларини намойиш этди. Меҳмонлар орасида журналист ва блогерлар, " Қуйи қават" китоби муаллифи Александра Иванюженка, "Хаёт" уйсиз ҳайвонлар бошпанаси асосчиси Ирода Маткаримовалар ҳам бор эди.
Тадбирдан кўзланган мақсад Меҳрибонлик уйлари тарбияланувчилари, ота-оналар ва ҳомийлик остидаги оилалар фарзандлари ўртасида психология фанини оммалаштириш ҳамда марказ очилганидан буён икки ярим ой давомида ташриф буюрган болаларнинг билим ва кўникмаларини намойиш этишдан иборат эди.
Шундай бўлди ҳам тадбирда иштирок этган барча болажонларга совғалар улашилиб, байрамона тушлик ҳам ташкиллаштирилди. Тадбир ноанъанавий бошланганидек, якуни ҳам ўзгача тус олди, барча болажонлар ўз орзулари ила ҳавога шарлар учиришди. Турли рангдаги шарлар болажонларнинг эзгу-тилакларини амалга ошириш учун Янги 2023 йилни қарши олгани осмону фалакка кўтарилди.
Қисқа муддат ичида Марказ мутахассислари ота-оналар ва оилавий меҳрибонлик уйлари тарбияланувчилари ўртасида ишончли муносабатлар ўрнатишга ҳамда оилаларда маънавий-руҳий муҳитни яхшилашга кўмаклашишди, шунингдек, ҳар бир болада мавжуд бўлган истеъдодларнинг баркамол ривожланишига ўз ҳиссаларини қўшди.
Марказ мутахассислари томонидан ўсмирларга мустақил ҳаётнинг бирламчи кўникмаларини ўргатиш борасида кенг кўламли ишлар амалга оширилмоқда. Оилавий болалар уйларини ташкил этган ота-оналарда профессионал психологларнинг маслаҳатларига бўлган эҳтиёжини инобатга олган ҳолда Болалар психологияси марказида "Тутинган ота-оналар клуби", онлайн гуруҳ фаолияти йўлга қўйилди.

Маълумот учун. Учта Меҳрибонлик уйи (Тошкент шаҳридаги 30, 22-сонли ва Чирчиқ шаҳридаги 14-сонли, уларда 193 нафар бола тарбияланмоқда) тарбияланувчилари билан "мослашувчанлик кўникмаси" (мустақил қарор қабул қилиш ва фикрлаш, янги экологик шароитларга осон мослашиш)ни шакллантиришга қаратилган "Soft skills" бўйича психологик тренинглар ўтказилмоқда; Меҳрибонлик ва Оилавий болалар уйлари фарзандлари, ҳомийликка олинган болалар билан психологик суҳбатлар; мактабгача бўлган ёшдаги болалар ва ўсмирлар билан чуқурлаштирилган психо-тузатиш ишлари; чуқур психологик ишларга муҳтож болалар билан психодиагностик ишлаш; болаларни оилага мослаштиришга, ота-оналарда юзага келиши мумкин бўлган руҳий стресс ва асоратларнинг олдини олишга қаратилган психологик-педагогик маслаҳат ва тренинглар; болаларнинг хусусиятлари ва фазилатларини аниқлашда замонавий психологик усуллардан (арт-терапия, неврография, мусиқа ва рақс, йога) фойдаланган ҳолда трансформацион тренинглар ўтказилмоқда.