Urganchda joylashgan “Bolalar uyi” dagi har bir bolajon oʻz oilasiga ega boʻldi.
Kuni kecha Urganchdagi “Bolalar uyi”ning so‘nggi tarbiyalanuvchisini buvisi oʻz qaramogʻiga oldi... Bolalar yotogʻi bo‘m-bo‘sh, inshoot noodatiy jimjit edi. “Farzandlarimiz oʻz oilasiga ega bo`ldi, - tabassum qiladi Bolalar uyi bosh shifokori Lyudmila Dzugayeva. – Joriy yilning 1-yanvar holati boʻyicha bizda go‘daklikdan 4 yoshgacha boʻlgan yetti nafar bola bor edi. Toʻrt oy ichida ularning barchasi vasiylikka, Oilaviy bolalar uylariga asrab olindi. E`tiborli jihati, ularning aksariyatini oʻz onalari olib ketdi. Lyudmila Ruslanovna 22 yildan buyon Urganch shahrida joylashgan Xorazm viloyati “Bolalar uyi”da ishlab keladi va shu vaqt ichida onasi bolasi uchun qaytib kelmagan yoki boshqa yaqin qarindoshlari olib ketmagan holatlarga ham duch kelganini aytib o`tdi. Soʻnggi yillarda muassasaga kelgan bolalar soni kamayishi kuzatilmoqda. – Bu yerda endigina ish boshlaganimda yiliga o‘rtacha 30-35 nafar chaqaloq qabul qilinar edi, – deydi L.Dzugayeva. – “Bolalar uyi”da 40 ta o‘rinning hammasi hech to‘lmagan, so‘nggi yetti yil ichida bizga keluvchi bolalar sonini kamaytirish jarayoni yanada jadallashib bormoqda. Menimcha, bu aholi turmush darajasi va sifati, odamlarning huquqiy savodxonligi yuksalib borayotganligidan va albatta, ijtimoiy qo‘llab-quvvatlash tizimi kuchaytirilganligidan dalolat beradi. Darhaqiqat, bugungi kunda ayol uchun qiyin moliyaviy ahvol, uy-joy yoki ish bilan bogʻliq muammolarni hal qilish ancha yengillashdi. Jamiyatimizning nikohsiz bola tugʻilishiga munosabati asta-sekin oʻzgarib bormoqda. Xotin-qizlar o‘z huquqlarini faolroq himoya qilmoqda, oʻziga boʻlgan ishonchi mustahkamlanmoqda. "Yosh ayollar tugʻruqxonada bolalardan voz kechishdi, lekin keyinchalik ular oʻz farzandlarini olib ketishdi", deb davom etadi Lyudmila Ruslanovna. – Ish topishda yordam so‘radik, bolalar nafaqasining yangi tizimi, jumladan, bola tug‘ilishi uchun bir martalik nafaqa to‘lash bo‘yicha maslahatlar oldik. 2022-yil aprel oyidan boshlab maktabgacha ta’lim muassasalariga bolalar ikki yoshdan qabul qilina boshlandi. Turmushga chiqmagan qizning ota-onasi nabirasi tugʻilganligidan xabar topib, nevarasini olib ketgan holatlar ham boʻldi. Bizda bor yo`gi bir marta bola ikki yoshgacha tarbiyalangan holat bo`lgan. Boisi bola nogiron bo`lib, uning ota-onasi ham imkonoyati cheklanganlar toifasidan edi va ular Bolani parvarish qila olmagan. Shundan so`ng, bolakayni boricha qabul qilishib, o`z ota-onasi olib ketgan.Urganchdagi “Bolalar uyi” misolida biz yopiq turdagi bolalar muassasalarini deinstitutsionalizatsiya qilish jarayoni qanday “ogʻriqsiz”, optimallashtirishlarsiz, tabiiy tarzda amalga oshishini koʻrmoqdamiz. Xotin-qizlar va bolalarni davlat tomonidan qo‘llab-quvvatlash, yetim va ota-ona qaramog‘isiz qolgan bolalarni himoya qilishning yangi tizimi joriy etilgani tufayli barcha bolalar o‘z oilalariga ega bo‘ldi. Bino, kommunal xonalar, "Bolalar uyi" hududi haqida nima deyish mumkin? Hammasi Sogʻliqni saqlash vazirligi balansida qoladi. Kelajakda katta ehtimol bilan bolalar uchun tibbiy muassasa boʻladi. Ota-onalar farzandlarini bu yerga davolanish uchun olib kelishadi va muassasa yana bolalar bilan toʻladi. Ammo bu butunlay boshqa hikoya boʻladi, har bir bolaning mehribon onasi va otasi bo`ladi. Ikki yil davomida bolalarni oilalarga joylashtirishning oilaviy va boshqa muqobil shakllarini joriy etish hamda Mehribonlik uylarini deinstitutsializatsiya qilish bo‘yicha olib borilgan ishlar natijalari bilan Mehribonlik.uz sayti va Telegram kanali orqali ham tanishishingiz mumkin.
