"Oilaviy bolalar uyi" tarbiyalanuvchilarining baydarka va kanoe sport majmuasiga sayohati
Baydarka va kanoeda eshkak eshish musobaqalari XIX asrning 60–yillarida Yevropaning ko‘pgina mamlakatlarida eshkakchilar klublari paydo bo‘lgandan so‘ng boshlangan va avval baydarkalarda, keyin kanoeda sport poygalari o‘tkaziladigan bo‘lgan. Baydarkalardagi musobaqalar ayollar va erkaklar o‘rtasida, kanoeda esa—faqat erkaklar o‘rtasida tashkillashtirib kelinadi. Baydarkalar bir kishilik, ikki kishilik va to‘rt kishilik, kanoe—bir kishilik va ikki kishilik. 1972 yildan baydarka va kanoeda slalom musobaqalari Olimpiada musobaqalari dasturiga tajriba tariqasida kiritilgan va katta qiziqishga, murosasiz bellashuvlarga sabab bo‘lgan.
O‘zbekistonda bu sport turi havaskorlari o‘tgan asr 50–yillaridan suv havzalari, anhor va daryolarda mashq qilib, musobaqalarda qatnasha boshladilar.
Ushbu sport turiga qaratilayotgan ezgu saʼy-harakatlarning ro‘yobi sifatida 2021 yilning dekabr oyida, viloyat markazining "Ko‘hna va boqiy Buxoro" majmuasining sharq tomonida baydarka va kanoe eshkak eshish sport majmuasi qurib, foydalanishga topshirildi.
Ayni kunlarda, aholi, yoshlar, mehmonlar va sayyohlarning sevimli maskaniga, ayniqsa ularning bo‘sh vaqtlarini unumli va samarali tashkil etayotgan mazkur muassasa sportsevar yoshlarni tobora o‘ziga mahliyo etmoqda.
Joriy yilning 19 aprel kuni Milliy gvardiya Buxoro viloyati bo‘yicha boshqarmasi masʼullari tomonidan viloyatda tashkil etilgan "Oilaviy bolalar uyi" tarbiyalanuvchilarining mazkur majmuaga sayohati tashkil etildi. Tadbirga mehmon sifatida tashrif buyurgan Buxoro muhandislik-texnologiya instituti talabalari esa tarbiyalanuvchilarga hamroh bo‘ldilar.
Sayohat davomida yoshlar, mazkur sport turining yaratilish tarixi, bugungi kunda umidli sportchilarimiz tomonidan erishilayotgan yutuqlar hamda hukumatimiz tomonidan mazkur sportni ommalashtirish borasida amalga oshirilayotgan tizimli ishlardan xabardor bo‘lish bilan birga, sportchilarning trenajyor zallarida ham bo‘lib, mashg‘ulotlar jarayoni bilan yaqindan tanishdilar.
Tadbir davomida mazkur sportga qiziquvchan yoshlar tomonidan berilgan savollarga mutaxassislar tomonidan atroflicha javoblar berildi.
