Poytaxtimizdagi 22-sonli Mehribonlik uyi tarbiyalanuvchilaridan iborat futbol jamoasi Xalqaro I - Chexiya futzal chempionatida 16 ta davlat jamoalari o‘rtasida faxrli 2-o‘rinni qo‘lga kiritishdi.
Poytaxtimizda joylashgan 22-sonli Mehribonlik uyi tarbiyalanuvchilaridan tashkil topgan 8 nafar yosh futbol jamoasi, Chexiya Respublikasining taklifi bilan joriy yilning 18-20 oktyabr kunlari Nimburg shahrida bo‘lib o‘tgan va 16 ta davlat Mehribonlik uylari tarbiyalanuvchilari o‘rtasidagi Xalqaro I - Chexiya futzal chempionatida faxrli 2-o‘rinni qo‘lga kiritishdi. Musobaqa murosasiz bellashuvlarga boy bo‘lib, tarbiyalanuvchilarimiz “V” guruhning barcha bosqichidagi 7 ta o‘yinda (Sloveniya 1 - 5 O‘zbekiston, Ukraina 0 - 11 O‘zbekiston, Xorvatiya 0 - 4 O‘zbekiston, Chexiya 0 - 4 O‘zbekiston, O‘zbekiston 6 - 0 Krupka(Chexiya), Latviya 1 - 2 O‘zbekiston) shuningdek, yarim finalda (O‘zbekiston 1 - 0 Slovakiya hisobida) mutloq g‘alabani qo‘lga kiritgan holda final bosqichiga ko‘tarilishdi. Final bosqichi kuchli raqib hisoblangan Polsha jamoasi bilan bo‘lib o‘tib, unda asosiy o‘yin 2 - 2 hisobi bilan yakunlandi. Penaltilar seriyasida esa (3-2 ) hisobi va 1 ta to‘p farqi bilan yosh futbolchilarimiz faxrli 2 o‘rinni qo‘lga kiritishdi.
Milliy gvardiya qo‘mondonligi tomonidan ushbu Mehribonlik uyi tarbiyalanuvchilariga qaratilayotgan eʼtibor va ularning sport bilan shug‘ullanishlari uchun yaratib berilgan shart -sharoitlar samarasida yosh futbolchilarimizdan iborat kuchli jamoa shakllanib ulgurdi. Xususan, ushbu Xalqaro musobaqada Maksim - darvozabon, Daniyel – chap qanot hujumchisi, Nodir- o‘ng qanot hujumchisi, Arslan - himoyachi, Namoz - himoyachi, Sanjar - markaziy yarim himoyachi, Igor - markaziy yarim himoyachi, kichkina Arslan – hujum chizig‘ida to‘p surdilar.
Mazkur Xalqaro chempionatda mamlakatimiz sharafini shijoat bilan himoya qilgan va yuqori natijaga erishgan 22-sonli Mehribonlik uyi tarbiyalanuvchilaridan iborat yosh futbolchilarimizni va ularning murabbiylarini Milliy gvardiya qo‘mondonligi va barcha shaxsiy tarkibi nomidan samimiy muborakbod etamiz!
