Yosh avlod bilan Chavandozlar maktabiga sayohat
Ot — millatimiz, ayniqsa er–yigitlarimiz uchun azaldan or-nomus va iftixor ramzi bo‘lib kelgan. O‘zbekistonda, jumladan, Buxoroda chavandozlik mahorati ming yillar burunga borib taqaladi. Tarixga nazar tashlasak, butun dunyoda ot sporti miloddan avvalgi 680 yildan boshlab antik Olimpiada o‘yinlari dasturiga kiritilgani, albatta, ot sporti va chavandozlikka muhabbat qadimdan shakllangani yaxshi maʼlum.
Ayni kunlarda esa, yurtimizda o‘sib kelayotgan barkamol avlodni ot sporti, zamonaviy beshkurash, polo va uloq-ko‘pkari bilan muntazam shug‘ullanishga jalb etish, ot sportiga ishtiyoqmand iqtidorli yoshlarni tanlash va saralash, seleksiya ishlarini rivojlantirish, yuqori mahoratli sportchilar tayyorlash maqsadida Milliy gvardiya Buxoro viloyati Chavandozlar maktabi tomonidan bir qator saʼy-harakatlar amalga oshirilmoqda.
Shu maʼnoda, Milliy gvardiya masʼullari tomonidan yoshlarning Chavandozlar maktabiga sayohati tashkil etildi. Tadbirga mehmon sifatida tashrif buyurgan Buxoro muhandislik-texnologiya instituti talabalari esa bolajonlarga hamroh bo‘ldilar.
Sayohat davomida yoshlar, ot sportning kelib chiqish tarixi, bugungi kunda umidli sportchilarimiz tomonidan jahon arenalarida erishilayotgan yutuqlar hamda hukumatimiz tomonidan ot sportini ommalashtirish borasida amalga oshirilayotgan tizimli ishlardan xabardor bo‘lish bilan birga, sportchilarning mashg‘ulotlar jarayoni bilan yaqindan tanishdilar hamda ot ustida sayr qildilar.
Tadbir davomida, ot sportiga qiziquvchan yoshlar tomonidan berilgan savollarga masʼullar tomonidan batafsil javoblar berildi.
