Қўқон шаҳридаги 12-сонли Меҳрибонлик уйи собиқ битирувчиси янги хонадон билан таъминланди
29 ёшли қаҳрамонимизга хонадон калитларини Қўқон шаҳар ҳокимлиги, Миллий гвардиянинг Фарғона вилояти бўйича бошқармаси вакиллари, ёши улуғлар ва маҳалла фаоллари тантанали равишда топширдилар.
Мақсуджон ва бошқа кўплаб собиқ битирувчилар орзусининг рўёбга чиқиши Миллий гвардия, Мактабгача ва мактаб таълими вазирлиги, Болаларни ҳимоя қилиш шуъбаси ва бошқа бир қатор ташкилотлар ҳамкорлигида амалга оширилган ишлар самарасидир. Хусусан, Президент топшириғига кўра, 30 ёшгача бўлган Меҳрибонлик уйларининг собиқ битирувчилари ҳақида маълумотлар тўпланган. Уй-жой билан таъминланмаган ёки яшаш учун мўлжалланмаган, шунингдек, белгиланган санитария-гигиена талабларига, ёнғин хавфсизлиги қоидаларига жавоб бермайдиган биноларда яшовчилар рўйхати алоҳида шакллантирилган.
- Мен жуда ҳурсандман. Турмуш ўртоғим ва фарзандим билан 2010 йилдан буён Меҳрибонлик уйи тарбияланувчиси сифатида ётоқхонадан менга ажратилган бир хонада яшар эдик. Бу ердаги шароит жуда ачинарли эди. Хоналар санитария-гигиена талабларига жавоб бермайдиган даражада эски бўлиб, ҳеч қандай тозалаш ишлари уйни шинам ҳолатга келтиришга ёрдам бермаган.
Рафиқам билан биринчи марта янги хонадонга кирганимизда, у қувончдан кўз ёшларини ушлаб туролмади. Ростини айтадиган болсам, оз уйим бўлишига ишонмаган эдим. Янги уйда яшаш учун зарур бўлган барча нарсалар мавжуд: уй жиҳозлари, маиший техника. Эндиликда бахтли оилавий ҳаёт кечириш учун ҳамма нарсамиз бор. Бунинг учун Давлатимиз раҳбаридан жуда миннатдормиз, сабаби уларнинг эътибори туфайли Меҳрибонлик уйларининг собиқ битирувчилари яшаётган шароит тубдан ўзгарди, - дейди «Мурувват» маҳалла фуқаролар йиғинининг янги фуқароси Мақсуджон Мирзаев.
