Оилавий болалар уйлари фарзандлари ўзларини турли хил касб сирларини ўрганишда синаб кўришмоқда
Миллий гвардия психолог-мутахассислари Фарғона вилоятидаги оилавий болалар уйлари ота-оналари билан биргаликда оиланинг тўнғич фарзандларига ўзларига мос иш танлашида ёрдам беришмоқда. Бунинг учун масъуллар йигит ва қизлар билан суҳбатлашиб, улардан қизиқишлари ҳамда бўш вақтларида нималар билан дилдан шуғулланишлари ҳақида сўраб ўрганмоқда. Шундан сўнг, ўсмирларнинг қизиқишларига қараб қайси касблар тўғри келиши ва бу касбларнинг қандай истиқболлари борлиги ҳақида атрофлича тушунтиришлар беришди. Болаларнинг илмий йўналишларга ҳам қизиқишлари ҳарбийларни қувонтирди. Кўпчилиги кимё, физика, биология ва ҳатто генетика ҳақида ҳам билишни исташларини айтишди. Болалар шунингдек, компьютер саводхонлиги, IT соҳасига ҳам қизиқиш билдиришди. Қизларга аниқ ва табиий фанлардан ташқари чеварлик ва соч турмаклаш ҳам ёқиши маълум бўлди.
Юқорида болалар қизиқиш билдирган соҳаларни ўрганиш ҳамда дунёқарашни кенгайтириш учун китоблар ва керакли ускуналар зарур бўлади. Бу борада эса “Меҳр дафтари” электрон платформаси ўз ҳиссасини қўшади.
Касб-ҳунар ўрганиш ёрқин келажак сари қўйилган мустаҳкам қадам бўлиб хизмат қилади. Бир вақтнинг ўзида бир нечта касб сир асрорларини ўзлаштириш эса мустақил ҳаётда ўзини йўқотиб қўймасликка ёрдам беради – дейди болалар.
