Тошкентда “Меҳрибонлик” уйининг яна 10 нафар собиқ тарбияланувчилари бошпана билан таъминландил
Аввалроқ хабар берганимиздек, Давлатимиз раҳбари ташаббуси билан бутун республика бўйлаб Миллий гвардия ва ҳокимият масъул вакилларидан иборат ишчи гуруҳлар ташкил этилиб, уларнинг вазифаси таълим муассасаларининг собиқ тарбияланувчилари турмуш шароитини ўрганишдир.
Натижада, мавжуд уй-жой шароитини яхшилашга муҳтож ёки давлат томонидан белгиланган хонадонларни ололмаётган 30 ёшгача бўлган 248 нафар йигит-қиз аниқланди. Рўйхатга киритилган ҳар бир ёшнинг уй-жой масаласи босқичма-босқич ҳал этилаётгани Mehribonlik.uz сайтидаги маълумотларда келтирилмоқда.
Навбатдаги хонадонларга бу сафар Тошкент Меҳрибонлик уйларининг 10 нафар собиқ тарбияланувчилари эга бўлди. Улардан беш нафари 30-сонли таълим муассасасида, тўрт нафари 21-сонли муассасада ва бир нафар қиз эса 23- сонли “Меҳрибонлик” уйида улғайган.
Балоғат ёшига етгач юқоридаги ўн нафар собиқ тарбияланувчилар пойтахтнинг Чилонзор, Сергели ва Мирзо Улуғбек туманларидаги ётоқхоналарга жойлаштирилган. Ёшларнинг яшаш шароитлари оғир аҳволда эди: яшаш хоналари, умумий ошхона, ҳаммом ва ҳожатхона капитал таъмирга муҳтож бўлган. Бундан ташқари, қизларнинг кўпчилиги фарзанд катта қилмоқда...
Уларнинг энг ёши шу йилнинг сентябрь ойида 30 ёшга тўлади, энг кичиги декабрда 26 ёшга тўлади. Яъни, собиқ тарбияланувчиларнинг бири етти йил, яна бошқаси эса ўн икки йил мобайнида уй-жой билан билан боғлиқ муаммонинг ечимини кутиб яшаганлар.
Яқинда эса ушбу ўн нафар собиқ тарбияланувчиларга Сергели, Яшнобод, Чилонзор, Миробод ва Мирзоф Улуғбек туманларида жойлашган хонадон калитлари топширилди.
Хонадонлар тўлиқ жиҳозланган, мебель ва зарур маиший техника, хонадон ичида ҳаммом, ошхонаси ва ҳожатхонаси бор.
Ёшлар ғамхўрлик кўрсатаётган давлатимиздан чексиз миннатдор.
